يسعدلي كل الحبايب
اليوم ان شاء الله راح أقدم لكم طريقتي في صنع مرق الدجاج البيتي ومعاه كام طبق شوربة بمناسبة قدوم الشهر الفضيل كل عام وانتم بألف خير
مع العلم انك بامكانك بنفس الطريقة صنع مرق اللحم او السمك وذلك باستخدام عظام اللحم او حسك ورأس وذنب السمك..
انا ما بحب الماجي ولا بستعملها في البيت الا اذا لقيت مرق دجاج من دون جلوتامينيت الصوديوم يلي هو من مكونات المرق الماجي وكنور وغيرها وهو ضار جدا بالصحة وخاصة الدماغ
مرق الدجاج
نحتاج الى عظام الدجاج أو ممكن تستعملي أي شيء من مخلفات الدجاج على أن يكون غير مطبوخ (رقبة، أجنحة أو عظام)
انا بجيب دجاجة مسحبة من اللحم .. يعني قفص الصدري ههههه
مع الرقبة وهاد شكلها
بالنسبة للمنكهات نحتاج الى:
جزرة
جذع البقدونس وهو يشبه الجزر الأبيض اسمه بالانجليزي Persnip.. ممكن الاستعاضة عنه بالبقدونس.
قطعة كرافس (الجذور ايضا) شكلها مثل راس البطاطا بس كبيرة celery
عود كرافس اخضر
شبت
بصلة
ثوم
شوية كرّات (شكله مثل بصل الأخضر بس أكبر
أي أعشاب عطرية عندك طازج او ناشفة (اكليل الجبل، زعتر، ريحان...)
ورق غار
حبوب فلفل أسود وفلفل حلو وملح
ملاحظة: لا نتسعمل البهارات العربية (قرفة وهال وما شابه)
نضع الجميع في الماء وما ان يغلوا نخفف النار ونتركهم شي ساعة ونصف يغلوا على مهل....
انا بعمل كمية كبيرة وبخبيها بالفريزر على عدة طبخات..
وهاي لما جهزت المرقة
نصفيها وتصبح جاهزة للاستعمال في أي طبق شوربة
وان شاء الله تجربوها وتستغنوا عن مرق الدجاج يلي صاروا ستات البيوت بيحطّوه بكل شي حتى بالشوربة يلي اساسا ما بتنعمل بمرق الدجاج .. متل شوربة العدس مثلا !
شوربة كريم الزهرة
المقادير
مرق الدجاج
قطع زهرة
جزرة
بطاطا مقطعة مربعات
قطعة زبدة (انا ما بستخدمها الا اذا عندي ضيوف
)ممكن الاكتفاء بالخضار يلي فوق .. بس انا اوقات بضيف (كرافس، كرّاث، وبقدونس)
فلفل أسود
القليل من عصير الليمون لتعزيز النكهة
ملح (انا أفضّل ملح البحر الصافي)
كريم الطبخ (حوالي نصف كباية شاي صغيرة)
الطريقة
نضع الكل مع بعض (ما عدا الكريمة) ونتركها لتغلي وتستوي
بعدها نضربها بالخلاط أو الفوود بروسيسور ونضيف الكريمة خلال الخلط
تقدّم مع رشّة بابريكا حلوة أو شطة بودرة على الوجه ومزينة بالبقدونس
ما شاء الله ولا قوة الا بالله
وهاي كمان لعيونكم!
وبألف صحة وعافية...